香港人要練易筋經

不要以為少林絕技已經失傳，要做武林高手的夢想早已幻滅，原來仲有機會。少林寺大師昨日同Emily講，香港人精神壓力大，又少運動，好適合練少林功夫修心養性，Emily即刻問大師，究竟「鐵頭功」、「金剛腿」兩種絕技邊樣更適合香港人？怎知大師的答案相當出人意表，竟然係《易筋經》！

少林寺在大嶼山開辦的武術文化中心昨日正式開幕，請到外交部駐港特派員呂新華、中聯辦副主任黎桂康同民政事務局長曾德成等等出席。12歲已經開始習武的少林俗家弟子汪猛話，《易筋經》內功其實好適合初學者，而進一級就可以學少林拳或羅漢拳……剛剛同金庸小說倒轉。

昨日的開幕禮，香港少林安排了幾個首批受訓的小弟子表演連環拳同五步拳，功架似模似樣。負責人話，若然小弟子學有所成，將來仲有機會到河南嵩山少林深造。

少林功夫博大精深，好武術者當然趨之若騖，但今時今日要學絕技不能單靠誠意，上山學藝也要有「實際」付出。要學易筋經、韋馱十八勢等武俠奇功，最低消費盛惠640元。

講番開幕禮現場，Emily昨日「千里迢迢」走入大嶼山，其實都係為咗德成局長同幾位駐港高官，怎知正當我想上前寒暄兩句，幾位主禮家賓已閃身離開，莫非各位官老爺領悟力強，即場學懂幾招少林「輕功」，齊齊鬆人？