邱騰華有個東華總理細佬

前幾日食晏經過金鐘某酒店，碰見近日因紮鐵工潮忙到一頭煙的勞工及福利局長張建宗，我立即上前睇下局長同邊過「撐枱腳」。行近兩步，便見到一個樣貌跟環境局長邱騰華十分相似的男士，莫非張局長與邱局長有約？

睇真點，原來是邱局長的細佬邱騰達（Tony）才真，Tony是東華三院2007至08年度的總理。飯局是東華三院的例行午宴，專誠邀請張建宗分享他新官上任的故事。如果無估錯，張局長應該是第一次跟Tony見面，當見到Tony與其兄邱騰華的長相有如餅印時，講笑話：「日後你阿哥唔得閒，你可以幫手『頂檔』（出席活動），無人會認得出！」

望真一點，邱氏兄弟個鼻、對眼最似，只是下巴有點分別，哥哥下巴兜兜、細佬就好有肉，雖然我唔識睇相，但都估到兩兄弟一臉福相：哥哥50歲未出頭便出任局長，前途無可限量；細佬本身也是發展商執行董事，專門發展豪宅，來頭不少。

Tony今年出任東華三院總理，當然為善不甘後人，單是每年東華的籌款重頭戲——歡樂滿東華，每位總理至少預算捐出7位數字的善款，Tony的家底當然實力雄厚。